कुडाळ ( प्रतिनिधी)
कुडाळ ता.16 – राज्य मानवी आयोगाच्या निर्देशानुसार कुडाळ ता. जावळी येथील बाजारपेठेत झालेली अतिक्रमणे सार्वजनिक बांधकाम विभागाच्या वतीने आज शुक्रवार ता.16 रोजी काढण्यात आली. यावेळी अधिकारी व ग्रामस्थ यांच्यामध्ये किरकोळ वादावादी झाल्याने काही काळ तणावाचे वातावरण निर्माण झाले होते, मात्र तहसीलदार व बांधकाम विभागाच्या अधिकारी यांनी समजून सांगितल्या नंतर काही व्यापाऱ्यांनी प्रशासनाला सहकार्य करत स्वतः होऊन अतिक्रमण काढून घेतली. त्यामुळे कोणताही अनुचित प्रकार घडला नाही. मात्र येथील एस. टी. स्टॅन्ड लगतचे काही व्यापारी यांनी न्यायालयात धाव घेतल्याने गाळे काढण्यासाठी न्यायालयाने तूर्तास स्थगिती दिली आहे. त्यामुळे हे संकट पुढील सुनावणी पर्यंत टळाले आहे.
याबाबत मिळालेल्या माहिती नुसार बाजार पेठेतील अतिक्रमणा बाबत संबंधित विभागाकडे तक्रारी दाखल झाल्या होत्या.एका रहिवाशाच्या घरात जाण्यायेण्याचा रस्ता अतिक्रमाणामुळे बंद झाला होता. त्यामुळे संबंधिताने याबाबत राज्य मानवी हक्क आयोगाकडे दाद मागितली होती. त्यानुसार संबंधित विभागाला चौकशी करून सदरची अतिक्रमणे हटवून रस्ता खुला करण्याचे निर्देश मानवी हक्क आयोगाने दिले होते.
त्यानुसार सार्वजनिक बांधकाम विभागाने पाहणी करून अतिक्रमित बांधकाम धारकांना एक महिन्या पूर्वीच नोटीस बजावल्या होत्या. या मध्ये बस स्टॅन्ड नजीक नव्यानेच बांधन्यात आलेल्या फळे भाजीपाला कट्ट्याचाही समावेश होता. सदर व्यापाऱ्यांची उपजीविका या व्यवसायांवर असल्याने अतिक्रमण हटाव कारवाई विरोधात गाळे धारकांनी न्यायालयात दाद मागितली आहे. न्यायालयाने पुढील सुनावणी पर्यंत परिस्थिती जैसे थे ठेवण्याचे आदेश दिले आहेत.
दरम्यान अन्य अतिक्रमण हटवण्यासाठी सार्वजनिक बांधकाम विभागाचे अभियंता आपल्या टीमसह सकाळी नऊ वाजता कुडाळ मध्ये दाखल झाले. यावेळी तहसीलदार राजेंद्र पोळ तसेच सहाय्यक पोलीस निरीक्षक अमोल माने यांच्या मार्गदर्शनाखाली पोलीस बंदोबस्त तैनात ठेवण्यात आला होता. प्रशासनाच्या कारवाईला व्यापाऱ्यांनी सकारात्मक प्रतिसाद दिला.
कुडाळ हे परिसरातील 20 कीमी अंतरातील सर्वांत मोठी बाजारपेठ असून येथे शेकडो व्यवसायिक वेगवेगळे व्यवसाय करित आहेत, काहींचे स्वताच्या मालकीची दुकाने आहेत तर काहींची भाडेतत्वावरील गाळे, दुकाने आहेत. मागील एक महिन्यापुर्वी येथील काही दुकानदारांना आपली अतिक्रमित दुकाने हटविण्यासाठीची नोटीस सार्वजनिक बांधकाम उपविभाग जावली यांच्याकडुन आल्याने दुकानदार फार धास्तावले होते, कारण ही दुकाने हटविल्यास दुकानदारांवर उपासमारीची वेळ येणार आहे. तरी या दुकानदारांचे अतिक्रमण हटविण्या अगोदर त्यांच्या उदरनि्र्वाहाची पर्यायी व्यवस्था करुन त्यांना न्याय द्यावा, यासाठी कुडाळ ग्रामपंचायत कार्यालयासमोर दि.21नोव्हेंबर रोजी एक दिवसाचे उपोषणही केले होते, मात्र तरीही आज प्रत्यक्षात कारवाई झालीच. जो पर्यंत अन्यायकारक अतिक्रमण मोहीम रद्द होणार नाही, तो पर्यंत गाळेधारक व व्यापाऱ्यांचा लढा सुरूच राहील असा आक्रमक पवित्रा व्यापारी व भाजीपाला व्यवसायिकांनी घेतला आहे.
यावेळी कोणा एकट्या व्यक्तीच्या तक्रारीमुळे हा निर्णय घेवून आमच्या गरिबांच्या जगण्याचा मार्ग कशासाठी उद्धवस्त करायचा, पुर्ण हयात येथे व्यवसाय करण्यात घालवली आहे, मात्र अतिक्रमणाच्या नावाखाली आमच कुटूंब अंधारात का ढकलून देत आहात, आमच्यावर उपासमारीची वेळ आणून अतिक्रमणाच्या कारणाने आमच्या जीवावर का घाव घालत आहात.. आम्हाला आगोदर रोजगार, किंवा नोकरी मिळवून द्या आणि खुषाल आमच्या व्यवसायावर बुलडोजर फिरवा असा संतप्त प्रतिक्रियाही काही व्यवसायिकांनी दील्या.
